నారాయణశతకము 3మ || కలుషాగాధవినాశికారియగుఛుం గైవల్య సంధాయియై
నలినొప్పారెడు మంత్రరాజమగు నీనామంబు ప్రేమంబుతో
నలరన్నె వ్వని వాక్కునం బొరయదె నన్నీచుఘోరాత్మయున్
వెలయన్ భూరుహకోటరంబదియ సూ వేదాత్మ నారాయణా !!33
మ || పరమంబై పరతత్వమై సకలసంపత్సారమై భవ్యమై
సురసిద్ధోరగయక్షపక్షముని రక్షోహృద్గహాభ్యంతర
స్ధిర సుజ్ఞాన సుదీపమై శృతికళా సిధ్ధాంతమై సిధ్ధమై
సరిలేకెప్పుడు నీయదునామమమరున్ సత్యంబు నారాయణా!! 34!!
మ||అధికాఘోతమోదివాకరమునైయద్రీంద్రజాజిహ్వకున్
సుధయై వేద వినూత్న రత్నములకున్ సుత్రాభిధానంబునై
బుధసందోహామనోహరాంకురమునైభూదేవతాకోటికిన్
విధులై మీ బహునామరాజి వెలయన్ వేదాత్మ నారాయణా !!35
మ|| పొనర న్ముక్తికి ద్రోవవేదములకంబుట్టిల్లు మోదంబునం
దునికి స్ధానము యిష్ట భోగములకున్నుత్పత్తియేప్రొద్దునున్
ఘనపాపంబులవైరి షడ్రిపులకున్ గాలావసానంబుమీ
వినుతాంఘ్రిద్వయపద్మసేవనగదా విశ్వేశ నారాయణా !!36
మ|| భవరోగంబులమందు పాతకమో బాలార్కబింబంబుక
ర్మవిషజ్వాలసుధా0షుగామృతతుషారా వ్రాతపాధోధిమూ
ర్తివి కైవల్యపదానలోకనకళాదివ్యా0జనశ్రేష్ఠమై
భువిలో మీదగు మంత్రరాజమమరున్ భూతాత్మ నారాయణా !!37
మ|| వరుసన్ గర్మపిపీలికాకృత తనూవల్మీక నాళంబులో
బరుషాకారముతోవసించినమహాపాపోరగశ్రేణికిం
బరమోచ్చ్చాటనమై రహస్యమహిమంబాటింపుచున్నుండుమీ
తిరుమంత్రంబగు మంత్రరాజమమరుం దివ్యాత్మ నారాయణా !!38
మ|| హరునిన్నద్రిజ నాంజనేయుని గుహున్నయ్యంబరీషున్ ధ్రువుం
గారి బ్రహ్లాదు విభీషణాఖ్యుని బలిన్ ఘంటాశ్రవున్నారదున్
గరమొప్పన్విదురున్ బరాశర సుతున్ గాంగేయునిన్ ద్రౌపదిన్
నరునక్రూరునిబాయకుండును భావన్నామంబు నారాయణా!!39
శా || శ్రీకిన్మందిరమైన వక్షము సురజ్యోష్ఠోద్భవ స్ధాననా
భీకంజాతము చంద్రికాంతర సుధాభివ్యక్త నేత్రంబులున్
లోకస్తుత్యమ రున్నదీజనక మాలోలాంఘ్రియున్ గల్గునా
లోకారాధ్యుడవైన నిన్నెపుడునాలో జూతు నారాయణా !!40
శా || విందుల్ విందులటంచు గోపరమణుల్ వ్రేపల్లెలో బిన్ననా
డందెల్ మ్రోయగ ముద్దుమోమలరనిన్నాలింగితున్ సేయుచో
డెందంబుల్ దనివారరాగరసవీటీలీలలన్ దేల్చుమీ
మందస్మేరము ఖేందు రోచులు మముఁన్మన్నించునారాయణా !!41
శా || విందుల్వచ్చిరి మీయశోదకడకున్వేగంబె పొమ్మయ్యయో
నందానందన !చందనాంకురమ !కృష్ణా!యింకా బోవేమిమా
మందం జాతరసేయబోదమిదెరమ్మా యంచు మిమ్మెత్తుకో
చందంబబ్బిన నుబ్బకుండుదురె ఘోషస్త్రీలు నారాయణా !!42
శా || అన్నా కృష్ణమ నేడు వేల్పులకు మీదన్నారమీ చట్లలో
వెన్నల్ ముట్టకు మన్న నాక్షణము నన్విశ్వాకృతి స్ఫూర్తివై
యున్నన్ దిక్కులు చూచుచున్ బెగడి నిన్నొలినుతుల్ సేయుచున్
గన్నుల్ మూయ యశోదకున్ జిఱుతవై కన్పింతు నారాయణా !!43
శా || ఉల్లోలంబులుగా గురుల్ నుదుటిపై నుప్పొంగ మోమెత్తి ధ
మ్మిల్లం బల్లలనాడ రాగరస సమ్మిశ్రంబుగా నీవు వ్రే
పల్లెం దాడుచు గోపగోనివహ గోపస్త్రీలయుల్లంబుమీ
పిల్లంగ్రోవి ని జుట్టిరాదిగుచు నీ పెంపొప్పు నారాయణా !!44
మ|| కసవొప్పన్ పసి మేసి ప్రొద్దుగలుగంగాంతా రముంబాసి య
ప్పసియు న్నీవును వచ్చుచో నెదురుగా బైకొన్న గోపాంగనా
రసవద్వృత్త పయోధరద్వయ హరిద్రాలేపనామోదముల్
పసిగొంచున్ బసి గొంచు వచ్చుఁటలు నేభావింతునారాయణా !!45
శా||చన్నుల్ మీదికి చౌకళింప నడుముం జవ్వాడ కందర్పసం
పన్నాఖ్యంబు నటించు మాడ్కి కబరీభారంబులూటాడగా
విన్నాణంబు నటింప గోపిజన గోబృందంబుతో వచ్ఛుమీ
వన్నెల్ కన్నుల ముంచి గ్రోలుటలు నే వర్ణింతునా నారాయణా !!46
మ || పెరుగుల్ ద్రచ్చుచు నొక్క గోపిక మిముం బ్రేమంబునంజూచిరా
గరసావేశత రిత్త ద్రచ్ఛనిడ నా కవ్వంబు నీవున్మనో
హర లీలంగనుగొంచు ధేనువని యయ్యాబోతునుంబట్టితీ
వర వృత్తాoతము లేను పుణ్యకథగా వర్ణింతు నారాయణా !!47
శా || కేలన్ గోలయు గూటి చిక్కము నొగింగీలించి నెత్తంబునం
బీలీపింఛము జట్టి నెన్నడుమునం బింఛావళిన్ గట్టిక
ర్ణాలంకారికడంబగుఛ్చమధుమత్తా లీస్వనంబొప్పనీ
వాలన్ గాచినభావమిట్టిదని నేవర్ణింతు నారాయణా!!48
శా || కాళిందీతటభూమి నాలకుదుపుల్ కాలూది మేయన్ సము
త్తాలాలోలతమాల పాదప శిఖాంతస్ధుండవై వేణు రం
ధ్రాలిన్ రాగరస0బునిండ విలసద్రాగంబు సంధిం చి గో
పాలవ్రాతము గండుగోయిలలుగా వర్ణింతు నారాయణా !!49
శా || రాణించెన్ గడునంచు నీ సహచరుల్ రాగిల్లి సోలంగమీ
వేణు క్వాణము వీనులంబడి మనోవీధుల్ బయల్ ముట్టగా
ఘోణాగ్రంబులు మీదికెత్తుకొని లాంగూలంబులల్లార్చి గో
శ్రేణుల్ చిందులు ద్రొక్కియాడుటలు నే జర్చింతు నారాయణా !!50
No comments:
Post a Comment