నారాయణ శతకము

                                  నారాయణ శతకము 

                                                                                  పోతన 

శా || శ్రీ రామామణి పాణి పంకజ మృదు శ్రీ తజ్ఞ పాదాబ్జశృం

        గారాకార శరీర చారుకరుణాగంభీర సద్భక్త మం 

         దారాంభోరుహపత్ర లోచన కళా ధారోరు సంపత్సుధా 

         పారావారవిహార!నాదురితముల్  భంజింపు నారాయణా !   1

శా || కడకుం బాయక  వేయినోళ్లు గలయాకాకోదరాధీశుండుం 

         గడముట్ట న్వినుతింపలేక నిగుడఁన్  గ్రాలంగ నొప్పారుమి 

         మ్మడరన్  సన్నుతిసేయ నడువశమే యజ్ఞాని  లోభాత్ముడన్ 

         జఢుడన్నజ్ఞుడ  నైక జిహ్వుడ జన స్తబ్ధుండ నారాయణా !2

శా || నే నీదాసుడ నీవు నాపతివి నిన్నే కాని యొండెవ్వరిన్ 

       ధ్యానింపం బ్రణుతింప నట్లగుటకు న్నా నేర్చుచందంబునన్ 

      నీనామ స్తుతులాచరించు నెడల న్నేతప్పులుంగల్దినన్ 

     వానిన్ లోగొనుమయ్య తండ్రి!విహితవ్యాపార నారాయణా !3

మ || నెరయ నిర్మల మైన నీస్తుతికధానీకంబు పద్యంబులో 

       నొరుగుల్  మిక్కిలి గల్గె నేనియు గడు న్యోగ్యంబే చర్చింపగా 

      గుఱుగణ్పైనను వంకబోయిన గడుం గుజ్జైనబేడె త్తినం 

      జెరుకుంగోలకు తీపుగాక కలదే చేదెందు నారాయణా !4

మ || చదువుల్ పెక్కులు సంగ్రహించి పిదపం జాలంగసుజ్ఞానియై  

        మదిలో బాయక నిన్ను నిల్పదగు నా మర్మంబు వీక్షింపడే 

        మొదలు గాడిదచారు గంధవితతుల్ మోవంగశక్యంబె కా 

       కది సౌరభ్యపరీక్ష జూడ కుశలే యవ్యక్త నారాయణా  | 5

 మ || లలిగబ్బoబు కరాటమి వ్విధనెల్లన్మించె బో నీకథా 

         వలి కర్పూరము నించినన్నితరమౌ  వ్యర్ధార్ధకామోదముల్

        పెలుచంబూనినయక్కరాటము తుదిన్ బేతే కరాటంబెపో   

       చలాదిందీవరపత్ర లోచన ఘనశ్యామాంగ నారాయణా | 6| 

మ  || మనమారన్నచలేంద్ర జాధిపతికి నాస్తాగ్రామాణిక్యమై 

       మునికోపానలదగ్ధ రాజతతికిన్ముక్తిస్ఫురన్మార్గమై 

       యెనయన్ పాయకశాయికిం జననియై యేపారుమిన్నేటికిం 

        జనిమూలంబగు నంఘ్రినాదుమదిలో జర్చింతు నారాయణా !7

శా || నీ పుత్రుండు చరాచర ప్రతతుల న్నిర్మించి పెంపారఁగా 

       నీపుణ్యాOగన సర్వ జీవతతుల న్నిత్యంబు  రక్షింపగా 

       నీ పాదోదకమీజగ త్త్రయముల న్నిష్పాపులం జేయగా 

       నీ పెంపేమని చెప్పవచ్చుఁ సుగుణా నిత్యాత్మ నారాయణా !8

శా || బ్రహ్మాoడావలిలో సత్వగుణివై  బాహ్యoబునందాదిమ 

      బ్రహ్మాఖ్యం బరతత్వ బోధములకున్  భవ్యాధినాధుండవై 

     బ్రహ్మేంద్రామరవాయుభుక్పతులకున్   భావింప రాకున్ననా 

    జిహ్మవ్యాప్తులనెన్న  నాదువశమే  చిద్రూప నారాయణా !9

మ|| ధర సింహాసనమై నభంబు గొడుగై తద్దేవతల్  భృత్యులై 

     పరమామ్నాయములెల్ల వందిగణమైబ్రహ్మా0డమాగారమై  

      సిరి భార్యామణియై విరించి కొడుకై శ్రీగంగ సత్పుత్రియై 

       వరుసన్నీఘన రాజసంబు నిజమై వర్ధిల్లు నా రాయణా !10

మ|| మగమీనాకృతి వార్ధిజొచ్చి యసురన్మర్దించియవ్వేదముల్

     మగుడం దెఛ్చి విరించి కిచ్చి  యతని న్మన్నించి యేపారగా 

     బగసాధించిన దివ్యమూర్తి వాణి భావింతునెల్లప్పుడున్ 

     ఖగ రాజధ్వజ భక్తవత్సల జగత్కారుణ్య నారాయణా !!11

మ|| అమరుల్  రాక్షసనాయకుల్  కడకతో నత్యంత సామర్ధ్యులై 

       భ్రమరీ దండము మందరాచలముగా బాదోనిధిం ద్రచ్చగా 

    దమకించెన్ భువనత్రయంబును గిరుల్  దంతావళుల్  మ్రొగ్గినం 

    గమకంబై ధరియించి మించినజగత్కళ్యాణ నారాయణా !12

  శా|| భీమాకార వరాహమై భువనముల్  భీతిల్లి కంపింపను 

        ద్దామోర్విo గొనిపోయి నీరనిధిలోడాగున్న గర్వాంధునిన్ 

       హేమాక్షాసురు వీకదాఁకి జయలక్ష్మిన్   గారవింపంగ నీ 

        భూమిం దక్షిణదంష్ట్ర నెత్తిన నినుం బూజింతు  నారాయణా !!13

శా || స్తంభంబందు నృసింహమై వెడలి యచ్ఛండాట్టధ్వనుల్ 

      దంభోళిం గడువంగ హేమకశిపోద్దాండాసురాధీశ్వరున్ 

      శుంభ ద్గర్భము వ్రచ్చి వానిసుతునిన్ శోభిల్ల మన్నైనుంచియ 

      జ్జం భారాతినిబ్రీతి దేల్చిన నినుం జర్చింతు నారాయణా !!14

మ||మహియు న్నాకసముం బదద్వయపరీమాణంబుగా బెట్టి యా 

    గ్రహమొప్పం బలిమస్తకంబొక  పదగ్రస్తంబుగా నెమ్మితో 

      విహరించింద్ర విరించి శంకరమహావిర్భూత దివ్యాకృతిన్ 

    సహజంబై విలసిల్లు వామనలసచ్చా రిత్ర నాఱయణా    !!15

మ || ధరణిన్  రక్తమహాహ్రదంబు లెలమి 0ద్రైలోక్యనిర్దిష్టమై 

      పరగ0బైతృకతర్పణంబుకొఱకై ప్రఖ్యాతిగా  దీవ్రతన్  

     నిరువయ్యొక్కటి మారు క్షత్రవరులన్నేపారనిర్జించి త 

      త్పరశుభ్రాజిత రామనామము కడున్  ధన్యంబు నారాయణా !!16