శ్రీమదుమాచోడేశ్వర శతకము-1

శ్రీమదుమాచోడేశ్వర శతకము

                                         శ్రీ రావూరి వేంకటేశ్వర్లు

1.    శా ||శ్రీవర్ధిష్ణుగుణాభిరామ!జగతీక్షేమంకరా!పార్వతీ                                భావాంభోజమరందధార!వినతప్రారంభనిర్వాహకా!

            సేవానమ్రజనాంతరంగనిలయాసీనా!చిదాకార!శ్రీ

            దేవీ పట్టణ పర్వతేంద్ర శిఖరాధిష్ఠాన!చోడేశ్వరా!

 తా!!జ్ఞానసంపదలనిచ్చుస్వభావముగలగుణములచేప్రకాశించువాడా!          లోకక్షేమమును కల్గించువాడా! పార్వతీదేవిహృదయపద్మమున మకరంద

          ధారయైనవాడా! సేవచే వినీతులైన వారి హృదయాలలోనుండువాడా!

          దేవీ పట్టణ పర్వత నివాసియైన ఓ చోడేశ్వరా!

  2.శా|| ఏవాడేనిభవన్మహత్త్వమగుబ్రాహ్మీసంస్ధితిన్ వర్ణన

          శ్రీవాల్లభ్యము నిర్వహింపగలడే?శ్రీకంఠ!బ్రహ్మాదులున్

          నీవస్తుత్వముగాంచలేరటగదా!నిత్యత్వ సంభాషితా 

          దేవీపట్టణ పర్వతేంద్ర శిఖరాధిష్ఠాన !చోడేశ్వరా! 

    తా||శాశ్వతధర్మముతో బ్రకాశించు శ్రీకంఠుడవైన దేవీపట్టణపర్వతేంద్రశిఖర

         నివాసియగు చోడేశ్వరా!నీ వస్తుత్వమును బ్రహ్మాదులు కూడ నెరుంగ

         లేరని వేదాలు చెప్పుచున్నవిగదా! నీ బ్రహ్మత్వమైన బ్రాహ్మీ స్ధితిని

         ఎవ్వరును వర్ణింపలేరుగా.

    3.శా||భావాతీత పరంపరాయితజను:ప్రారబ్ధకర్మాత్మక

            శ్రీ విద్యావినయప్రమేయలహరీ రింగద్గుణప్రేక్షితా!

            దేవా!దీనజనావనప్రియకృతీ!దీవ్యత్తనూవైభవా!                    

            దేవీ పట్టణ పర్వతేంద్ర శిఖరాధిష్ఠాన !చోడేశ్వరా!

      తా||భావాతీత చోడేశ్వరా!జననమరణ సంసార చక్రములో తిరుగుచున్న

           ప్రాణులసకలవిషయములనుచూచిఆర్తులనురక్షించుమూర్తి

           వైభవమున్నవాడవు.

    4.శా||ఏ వాక్యమ్ములు సర్వకాలమును నిన్నే పల్కు విశ్వమ్మునం

            దావేశించి పదార్ధచింతనము నత్యంతమ్ముజృంభింపగా

            భావంబున్ వెలయింప జేయునవి మాప్రత్యక్షవేదమ్ములో

            దేవీ పట్టణ పర్వతేంద్ర శిఖరాధిష్ఠాన !చోడేశ్వరా!

      తా||ఓ చోడేశ్వరా!వేదములెల్ల ప్రపంచమునందలి వస్తువులన్నియు

            నీవే యని చెప్పుచున్నవి.

    5.శా||ప్రావీణ్యంబిసుమంతలేదుకద!శాస్తంబందు వేదాన్తవి

           ద్యా వైదుష్యము లేద,యర్ధమును సందర్భoపగాలేను,భ

           క్త్యావేశమ్మున మాత్రమెన్నెదనునీదౌదివ్యమూర్తిన్దమిన్         

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

     తా||ఓ చోడేశ్వరా!నాకు శాస్త్ర పాండిత్యము,వేదాంతవిజ్ఞాననైపుణ్యములు

           లేవు.పురుషార్థాలను సమన్వయము చేయలేను.కేవలము

            భక్త్యావేశముతో మాత్రమేనీదివ్య స్వరూపమును గీర్తించెదను.

      6.శా||నీవార్వంబగునాలపోతు గరుణానిర్ణిద్రవృత్తిన్ జగత్

            సేవన్ జేయును వట్టిగడ్డిదినియెంతేధాన్యముల్ బండగా

           నీ వాల్లభ్యము సర్వభూతదయకున్నిక్కంబు గాణాచిరా

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

     తా||ఓ చోడేశ్వరా!నీవాహనమైన ఎద్దు వట్టిగడ్డినితినిరైతులకుసహకరించుచు         అనేకపంటలకుసాధనమైలోకసేవనుజేయును.నీప్రభుత్వమునిజముగా

            సర్వభూతదయకు నిలయమైనది.   

 7.శా||జీవాత్మైక్యము నీవుగా దలచి తఛ్ఛ్రీలబ్ధిమన్మూర్తులై

            జీవుల్ ఖండితభావబంధులగుచున్ జిన్మూర్తులై యాత్మలో

            గైవల్యంమ్మునుగాంచి మించెదరు సౌఖ్య స్ఫూర్తి మత్సర్వులై

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

       తా||ఓ చోడేశ్వరా!లోకములో జీవాత్మపరమాత్మల యేకత్వమునీవే యని భావించి  జ్ఞానస్వరూపులై సమస్తమందు నానంద స్ఫూర్తి గలవారై బ్రహ్మత్వమును పొంది అతిశయించెదరు.  

         8.శా||ప్రోవుల్ ప్రోవులు జీవరాశులుగన్  భూభారముల్  దేవనీ

                    సేవాదూరములైన వేటికి?పునశ్చింతాభరమ్ముల్,భవ

                    సేవాతన్మయజీవియొక్కడు గదా!శ్రీనించు నీధారణన్

                     దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా! నీ సేవకు దూరములై చింతలతోనున్న ప్రాణుల సముదాయము అప్రయోజనము. భూమాతకు బరువుమాత్రమే. నీ సేవలోనున్న సేవకులు నిన్నెల్లప్పుడు సేవించుచు ఇహపర సుఖములను బొందును.

        9.శా||నీ వాత్సల్యము జూరగొన్నమనుజుల్  నిత్యంబుగార్హస్థ్యధ

                ర్మావిర్భూతసమస్తభూతనిచయప్రాంచత్కృపాసింధులై

               ప్రొవన్జూతురుదీనకోటినిగృపాపూర్ణావతారా!ప్రభూ

                దేవీ పట్టణ పర్వతేంద్ర శిఖరాధిష్ఠాన!చోడేశ్వరా!

           తా||ఓ చోడేశ్వరా!నీ కృపను పొందిన సేవకులు సమస్తప్రాణుల యెడ దయాసముద్రులై గృహస్థధర్మముతో నుండి దీనులను రక్షించుటకు నెదురుచూచుచుందురు.  నీవు  కృపాపూర్ణావతారుడవు.

***