శ్రీమదుమా చోడేశ్వరశతకము -9

                       శ్రీమదుమాచోడేశ్వరశతకం -9

                                            శ్రీ రావూరి వేంకటేశ్వర్లు

73.శా||నీవా! విశ్వవిశాలభావమవు నీనేనంటివా?సంకుచ

        ద్భావంబున్ జగదీశ భావములదౌద్వైతమ్ము వస్తుత్వమం

       దావేశింపదటన్న భావమిడరా!యద్వైతమైపోదునో

        దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!నీవు ప్రపంచమంతయు నిండిన భావము.నేను పరిమితమైన భావమును .జగత్తు ఈశుడ అను భావములకు జెందిన

ద్వైతభావము,సమస్తవస్తువులందు ఆవేశిoపదని భావమునిమ్ము.నేనే

యద్వైతము(బ్రహ్మము)నగుదును.

74 .శా||ఆ వైకుంఠపతి ప్రవృత్తి కలితంబర్ధాoగనాకారా మా

           ర్షావిష్టoబమృతాఢ్యశీర్షమఘనిర్యాసమ్మఖండమ్ము యో

           గావాసమగు నీ స్వరూపమును దేవా !భక్తీ ధ్యానించెదన్

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా! సకలలోకరక్షకుడైనవిష్ణుదేవుని ప్రవృత్తి చేతను

    గూడ నొప్పునది అర్ధనారీశ్వరరూపమైనది. అమృతముతో నిండిన

   శిరస్సు గలది(గంగతో నిండిన అమృతముచే నొప్పు చంద్రుడు గల

   శిరస్సు గలది)పరిపూర్ణమైనది.యోగమునకు నిలయమైనదిఅగు

  నీ స్వరూపమును భక్తితో ధ్యానించెదను.

75.శా||భీవారమ్మెడలున్ భవత్పదకృతి ప్రేయో విశేషమ్మునన్

           ధీ వైశద్యమునబ్బు త్వత్పదయుగా దీన ప్రవృత్తి న్మహా

           శ్రీ విస్తారమునిండు త్వత్పదనతి ప్రేయో విశేషమ్మునన్

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!నీ పద సేవాకృతి చేతగలుగు మహాత్వవిశేషముచేత

    సకల భయములు దొలగును.నీస్ధానమును చేరుటవలనగలుగు మహ

త్వమువలనబుద్ధికినైర్మల్యముగలుగును.నీపాదములకునమస్కరించుటచేగలుగు మహత్వమువలన సకలసంపదలు పరిపూర్ణముగాగల్గును.

76.శా||కావుద్వేగములార్యధర్మసుకృతిo గల్పింప శక్తంబులో

         దేవా!తావక భవ్యపాదయుగళీ దీవ్యన్మరందామృత

         శ్రీ విస్తారముద్రావుటొక్కడగువాసిన్శక్తమార్యాయుతా   

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!వైదికమైన ఆర్యధర్మములగు సత్కార్యములకు

  సమకూర్చుటకు ఆవేశములు పనికిరావు.ఆవేశముచే సాధింప    వలనుపడవు.నీ పాదపద్మమకరందధారలగ్రోలు జీవసంతతి

మాత్రమే ఆర్యధర్మములనుద్ధరించుటకు శక్తమగును.   

77.శా||చావున్బుట్టువు గష్టమున్  సుఖము దుష్టంబదుష్టమ్మునా

        భావంబుల్ సమమైనయట్టిస్ధితిత్వత్పాదావ్యయాం భోజచిం

          తా వైశిష్ట్యమునందు దాగలదు తద్ధర్మక్రియాతుష్ట!శ్రీ

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!చావుపుట్టు కష్టముసుఖము దుష్టము అదుష్టము

     అను ద్వంద్వ భావముల సమానమైన స్ధితి నీ పాదపద్మముల

    యందెడతెగనిధారనయoదుండును.నీవు పరమార్ధధర్మకార్యములకు

    ఆనందించుదువు.  

78.శా||ఆవిర్భూత జగత్త్రయావనకలావ్యాపార వన్మూర్తిర

          మ్యా విశ్వాఖిలపూర్ణదివ్యమహిమా! మందారమాలాస్ఫుర

         ద్దేవానీక కిరీటకోటి విగళద్దీప్త్యాయితాంఘ్రిద్వయీ

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ముల్లోకములను రక్షించు కలాత్మకమైన వ్యాపారముగల

    మూర్తులచే రమ్యమైనవాడా!విశ్వమునంతట నిండిన దివ్యమైన మహిమ గలవాడా!కల్పపుష్పములదండలతో ప్రకాశించు దేవతలకిరీట ములయంచులనుండిజారుచున్న కాంతిగా నగుచున్న శ్రీ చరణ యుగములు గలవాడా!   

79.శా||దేవా!సంఘమునుద్ధరించుటకునుద్దీప్తార్షముల్ శాస్త్రముల్

         ధీ వైశద్యపరంబులై పొలిచె దద్దీ ప్తిన్గనంజాలకీ

        సేవాదూరజనంబు “సైన్సు”నిలవాసిన్ శాస్త్రమున్జేసెనో

         దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ఋషి ప్రోక్తములైన శాస్త్రములు సంఘమునుద్ధరించుటకు

బుధ్ధి వైశద్య పరములై యొప్పియున్నవి.సేవాదూరులైనసైన్సును శాస్త్రముగాచెప్పుచున్నారు.               

      80.శా||ఆవాసాయితరాజతాచల ! పరార్ధార్ధిప్రజాహార్ధవి

           ద్యా!విశ్వాలఘుభక్తియోగఫలసంధానైక దీక్షాలఘు

           శ్రీ విస్తారితచక్రవర్తిపదవీ! శ్రీకంఠ !విశ్వేశ్వరా!

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!వెండికొండనివాసా!పరమార్ధమునుగోరుప్రజల

హృదయసంబంధమైన విద్యయైనవాడా! ప్రపంచాన స్ధిరమైన భక్తియోగమునకు ఫలమును సమకూర్చు సాటిలేని దీక్షయను

సంపదచే విస్తారమైన సార్వభౌమపదవిగలవాడా! శ్రీకంఠ! విశ్వేశ్వరా!

81.శా||చేవల్ దేరిన యోద్ధతోనెదిరి వాసిన్గాచంగా వచ్చు నే

        యేవిద్యాసమరంబులందయినగానీ యజ్ఞతా రూపమౌ

       నీవైరి న్గె లువంగశక్యమగుటె సంసారాజినిన్నెoచకో

       దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!  ఆరితేరిన ప్రతిస్పర్ధతో నేవిద్యావిష యకములయిన

     యుద్ధములందయినడీకొనివిజయమును గాంచుట శక్యమేయగును.

కాని అజ్ఞానరూపమైనయీ శత్రువును మాత్రమెదిరింజయంబు గాంచుట

శక్యమగునా?నిన్ను సేవించినచో నయ్యది శక్యమగును.

                                             

   82 .శా||దీవుల్ మారిన నీ భవాబ్ధినెటనో దేవా!భవత్పాదప 

         ద్మావిర్భూత మరందధారలకుసందర్భించు నా ధారణా

        శ్రీవైదగ్ధిని మార్చకయ్య భవవైరీ!యార్షధర్మాకృతీ!

       దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ఈ సంసారసముద్రములో దీవులెన్ని మారిననూ నీ

    పాదపద్మ మకరందధారలపై బ్రవహించు నాయాలోచనము నందలి

    నేర్పును మాత్రముమార్చకుము.నీవుభవవైరివి,ఆర్షధర్మస్వరూపుడవు.

  83.శా|| ఓ విశ్వేశ్వర!ఓ శ్రితార్తిహర!ఓహోహో !పరార్ధస్ఫురా

            ఓ విష్ణ్వాకృతీ !ఓ మనోజనికృతీ!ఓహో !విషస్వీకృతీ !

           ఓ వీరేశ్వర!ఓ హృదంతర !హరా!ఓహో!సదాధార!శ్రీ

           దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా! నీవు సమస్త ప్రపంచానికి ప్రభువు.నిన్ను ఆశ్రయించినవారి పీడలను పోగొట్టువాడవు.పరమార్ధరూపమున్ బ్రకాశించువాడవు,సర్వవ్యాపకయాకారా!మదన హర ! లోకక్షేమంకోసం విషాన్ని మింగినవాడా!వీరులకు ప్రభువవు.హృదయముల లోపలిభాగమైనవాడా !మంచికాధారమైన వాడా!నిన్నెపుడుస్మరించెదను.

84.శా||భావాతీతచరిత్ర !పంకజసఖీ ప్రాంచత్సుగాత్రా!నమ

        త్సేవాపాత్ర!శ్మశానసంగతగతి శ్రీనిష్ఠ !కల్యాణ వి

        ద్యావారాన్నిధిబధ్ధబంధుర మహాధారాయిత స్తోత్ర !శ్రీ

         దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!భావమునకందని చరిత్రగలవాడా!స్త్రీరత్నముచే బ్రకాశించువాడా! శ్మశానసంచారసంపదయందునిష్ఠగలవాడా!మంగళమైన

విద్యయను (ఆత్మవిద్యయను)సముద్రమున గూర్చబడిన మహాధారగానైన

భక్తులస్తోత్రములు గలవాడా!నిన్ను స్మరించెదను.

    85 .శా||ఆవిర్భూతసస్తభూతకలనవ్యాపార సంధాన!స

            త్యావాసా!బహుధాపరిస్ఫురితమత్యావిష్ట మూర్తీ !గుణా

            భావా!భావభవాంతకా! శుభపరా! బ్రహ్మాండభాండోదరా

              దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా! నీవు సమస్త భూతములవ్యాపారములను సమ

    కూర్చువాడవు.సత్యమందున్నవాడా!పలువిధాలబ్రకాశించు బుద్ధి యందావేశించు స్వరూపము గలవాడా!శుభమునందు ఆసక్తి గలవాడా!

నిర్గుణుడా!మదనహరా!నిన్ను ధ్యానిoచెదను.