చూదేశ్వరశ తకం --7

   శ్రీ మదుమాచోడేశ్వరశతకం -7

                                   శ్రీ రావూరి వేంకటేశ్వర్లు

54 శా||చావుంబుట్టువు నైన సంసృతిని నైచ్యంబేదిరా!కానిదో

దేవా!తావక భవ్య నామజపరక్తిన్గల్గు నానందమే

యావంతేనియునున్నదొక్కడు గదా!యధ్యాత్మదివ్య ప్రభా!

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!చావుపుట్టువుల రూపమైన యీ సంసారము నైచ్యము కానిదేమున్నది?నీ భవ్యమైన నామజపమున నాసక్తి వలన కలుగు

నానందము లేశమాత్రము గల్గిన విషయమొక్కటే నైచ్యము కానిది.

55.శా||హావమ్ముల్ మృదుభావముల్ గలిగి దీవ్యద్రూపమునల్గితా

నేవమాక్షిఫాలమందుదిలకంబెలేనిచోనొప్పునా ?

ధీ వైదుష్యము రమాభిరాములును నిన్ సేవింపరా ?యొప్పరో

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓచోడేశ్వరా!హావభావములను మంచి సౌందర్యము గల్గియున్నను

నుదుట తిలకము లేకున్నచో నే సొగసుకత్తెయు బ్రకాశింపదు.అట్లనే

ఎంత పాండిత్యముసంపద గల్గియున్నవారును నిన్నుసేవింపనివారైనచో          ప్రకాశింపరు.

56.శా||దేవా! సేవకపారిజాతతరువా! దివ్యప్రభావా! జగ

త్సేవాదీక్షిత!దీనజనతాధిష్ఠాన! భాగీరధీ

హేవాకా! హలాహలాకంఠ!గతమాయీ!భావనాతీత!శ్రీ

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||సేవించు వారి కోర్కెలు దీర్చుటకు గల్పవృక్షమైన వాడా!తేజోమయ

ప్రభావా!దీనులను రక్షించువాడా!గంగను నెత్తిపై నుంచు కొన్నవాడా!

విషకoఠ !నీవు భావాతీతుడవు.చోడేశ్వరా!

57.ఏ వేల్పులు నినుబోలగల్గుదురె తండ్రీ! లోకరక్షార్ధమై

చావుంగెల్చి విషంబు గ్రోలగలరె! సౌహార్దమే నీవొకో!

నీవే నీకును సాటి;యద్వయ!శివా! నిత్యానుకంపానిధీ!

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||స్వామీ!చోడేశ్వరా!లోకముల నేదేవతలును నిన్ను బోలు వారులేరు.

ఎవరైనను మృత్యువునుజయించి,విషమునుద్రాగగలరా?సుహృద్ధర్మమే

నీవని తోచుచున్నది.నీవద్వయుడవు.నీకు నీవే సాటి.నీకు లోకముపై

నిత్యమైన దయ గలదు.

58.శా||నీ వైద్యంబఘరుక్తతిన్దొలచురా! నీ యోగామార్తావన

శ్రీ విద్యావిభవంబు, నీ తనువు రాశీభూతవేదమ్ము;నీ

ప్రావీణ్యoబులు దుష్టసంహరణముల్ స్వామీ!జగన్నాధమో

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!నీవు పాపములను రోగములను బోగొట్టుటకు

వైద్యుడవు.దీనులను రక్షించు విద్యగల మహాయోగివి.వేదమే

నీ శరీరము.నీ నేర్పులు దుష్టులను సంహరించునవి.నీవు                     జగన్నాధుడవు.

59.శా.||మావాసుండగుగాక నీ పదములన్మాన్యమ్ముగానెంచకే

యేవాడన్జనెనేని నిల్చినను గానీ దివ్యతన్గాంచలే

డో విశ్వేశ్వర! వైష్ణవాలయములెన్నో! చూడదెల్లంబగున్

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా! సంపదకు నిలయమైనవాడయ్యునునీ పాదములను

పూజింపదగినవిగా భావింపకుండనెచటికేగినను బ్రకాశింప నేరడు.

(దివ్యతను గాంచలేడు)

6౦.శా||దేవా!గాంగఝరీతరంగవిలుఠద్దివ్యాన్న రేఖా కిరీ

టా!విశ్వాకృతి !సర్వభూతమయ! శిష్ట వ్రాతరక్షామణీ

నీవే !సర్వము నాకు బ్రోవగదవే! నిత్యానుకంపానిధీ!

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా|| ఆకాశగంగా తరంగాలలో నెగిరిపడుచున్నచంద్రరేఖ కిరీటముగాగల

వాడవు.విశ్వాకృతివి. సర్వభూత వికారుడవు.సజ్జనులను రక్షించు వాడవు.నిత్యదయానిధివియైన యో చోడేశ్వరా!నాకు సర్వము నీవై

రక్షింపుము.

61.శా||భావాంభోజ మకర్దమోద్భావము  దీవ్యద్వైఖరీవాహినీ

శ్రీ వాస్తవ్యమొకండుదక్క నిడగా లేదేదియున్నాకడన్

పావిత్ర్యమ్మగు భక్తిద్వచ్చరణ శుంభత్పూజకర్పించెదన్

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||దేవా!ఓ చోడేశ్వరా! నీ పాదపూజకు సమర్పించుటకు నా దగ్గఱ

నేమున్నది?ప్రకాశించు వాక్ప్రవాహమున నున్న బురదలో పుట్టని

పద్మము మాత్రమున్నది.దానినే నీపాదపూజకు సమర్పింతును.

62.శా||ఏవో యేవొ !తలంపులొక్కమెయిరానేవచ్చునందున్ భవ

త్సేవాదీక్షరహించుధారకును నెంతేశక్తియౌటన్ మదీ

యావేశంబుల నెన్న ద్రుంచు;నిడుమయ్యా దార్ఢ్యoబునన్

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||దేవా!చోడేశ్వరా!కవినగుటచే నాకు బలువిధములైన భావాలు

వచ్చుచుండును.నిన్ను సేవించు యోగమునందలి దీక్ష శక్తివంతమగుటచే నా భావాల్లోని యావేశములనుబోగొట్టును.స్వామీ!నాకు

అట్టి దీక్షను దృఢముగా గల్పింపుము.

63.శా||ఈ విశ్వంబదియెల్ల నీ కవిత;బ్రాహ్మీమూర్తి !తత్రత్యవి

ద్యావైదుష్యమునేర్పుసద్గురుడవయ్యా !నీవు నేనన్న ద్వ

త్సేవాధీనుడనందు బాత్రమఱియున్ శిష్యుండ!బోషింపరా

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!యీ ప్రపంచమoతయు నీ కవిత్వము.విద్యా స్వరూపుడ వైన నీవందలి విద్యలోని పాండిత్యమును నేర్పు గురుడవు,నేను నీ సేవకధీనుడను.నీ కవిత్వమైన ప్రపంచమున నొక పాత్రమును .నీకు శిష్యుడను.నన్ను పోషింపుము.

64.శా||దేవీరమ్యశుభాంగ!భారతసటీ దీవ్యద్వ్రత ప్రాచురీ

శ్రీ విద్యాభవనా! పరార్ధకలనా!ప్రేమాకృతీ !నైగమ

శ్రీవర్ధిష్ణుగుణాఢ్య!సర్వజగతీ శ్రేయోనిధానా!శివా!

దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓచోడేశ్వరా!పార్వాతీసుందరమైన శరీరము గలవాడా!భారత

నారుల పాతివ్రత్యధర్మ ప్రచారమైన శ్రీ విద్యకు నిలయమైనవాడా!

జ్ఞానముతో నొప్పు వాడా ప్రేమస్వరూపా!వైదికసంపదను వృద్ధి

నొందించు శీలముగలసద్గుణుడా! సర్వ జగత్శ్రేయోదాయకా!శివా!