శ్రీమదుమాచోదేశ్వరశతకం-4.

శ్రీమదుమా చోడేశ్వరశతకం – 4 

                             శ్రీ రావూరి వేంకటేశ్వర్లు  

     

     28.శా||”లావాదీవులు”నాదుజీవితముసర్వజ్ఞుoడవో దేవ! నా

          భావంబీవు నెరుంగబోలుదిక నా పాపంబులన్ద్రోచి నీ

         సేవాసక్తిని బెంచి గేస్తుతనమున్సిద్ధింపగా జేయరా!

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

 తా||   నా జీవితమంతయు దాపములకు నిలయము.ఓ చోడేశ్వరా!

        నీ కన్నియు తెలుసు కదా!నా తాపములను పోగొట్టి నీయందు                                                                                                    సేవాసక్తిని పెంచి నా పాపంబులన్ద్రోచి గృహస్ధధర్మమును సిద్ధింపగా

       జేయుము.

29.శా||ఏవో!నామదినూహసేయుగవితావ్యూహమ్ములoదున్నయీ

          భావమ్ముల్  భవదీయతత్వమును సంభావింపగా,నోపునే

          యీ విశ్వoబదియెల్ల నీ కవిత; యందేనేమియై యుందునో

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!నా మనస్సులో నూహించు గవిత్వ యుక్తులలోని

     నా భావములు నీ తత్వమునూహింపగలవా?ఈ ప్రపంచమంతయు

    నొక మహాకావ్యము.అది నీచేరచింపబడినది.అందులో నేనే లేశమో                               యైయుండును.

30.శా||సేవాధీనమునీమహత్వముకళాసిద్ధాంతరాద్ధాన్తముల్

          గావేమాత్రమునిన్నులోగొనగసంస్కారోదయంబైన యా

         సేవాభాగ్యము జన్మజన్మములకు న్సిద్ధింపగాజేయరా!

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓచోడేశ్వరా!నీ మహిమ సేవకు వశమైనది.శాస్త్రాలలోని పూర్వపక్ష   సిద్ధాంతములునిన్నువశపరచుకొనుటకుజాలవు.పూర్వజన్మ                            సంస్కారమువలన బుట్టు సేవాభాగ్యము నాకు జన్మజన్మాలకు                సిద్ధించునట్లు చేయుము.

31.శా||రావా!ప్రోవవ! మామకీనమగుగర్వంబెల్లబోకార్పవా!

         ఈవా!చిత్త నిర్మలత్వము పరంబేనందుకోజూడవా!

         ఈవే తల్లిదండ్రివిన్గురుడవున్నే దైవమున్నాకు శ్రీ   

         దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||నాకు తల్లివి,తండ్రివి,గురుడవు,సర్వదైవములు నీవే;ఓ 

      చోడేశ్వరా!వచ్చి రక్షించి నా గర్వమును పోగొట్టుము.

      నా చిత్తమున నైర్మల్యమునుకల్గించి పరమును

     చేరునట్లు చేయుము. 

32.శా||జీవుల్ పుట్టుచువృద్ధిజెందుచునురాశీభూతమౌ మోదక

        ష్టావేగమ్ముగాద్వైతవాసనలనధ్యానిoచియున్ జచ్చుచున్

        వేవేగన్ మఱలంగబుట్టుదురునీ విశ్వత్వముంగొల్వకో

       దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!నిన్ను విశ్వరూపునిగాసేవింపనినరులు పుట్టుచు

     బెరుగుచు సుఖదు:ఖరూపకములైన ద్వైత వాసనలతో నిండి

    చచ్చుచు పుట్టుచు సంసార చక్రమందు తిరుగుదురు.

      

33.శా||కోవాబిళ్ళలుపాలుతేనెజలజాక్షుల్ మెచ్చియందిచ్చునా

        హావంబుల్ మధురాధరోదితసుధా ప్రారంభముల్ దేవ!నీ

        సేవంగలెడుసౌఖ్యమందు లవతాశ్రీ స్థానమున్గాంచునా 

  దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||     ఓ చోడేశ్వరా!కోవాబిళ్ళలు,పాలు,తేనె,వగలాడులు మెచ్చుకొని

     చూపు చేష్టలు తృప్తితో తమంతతామoదించునధరామృతములు,

    నీ సేవవలనకలుగుననానందములోలేశభాగమైనను                                        ఆనందమునీయలేవు.

34.శా||పోవైశ్వర్యములాలుబిడ్డలకుసమ్పూర్ణ మ్ముగామేలుదా

        నేవేళన్సమకూరుసంఘమున బ్రాహ్మీత్వంబు సిద్ధించెడిన్

       శైవంబైన భవత్పదార్చవమునన్సిద్ధంబు లోకాళికో

      దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా|| ఓ చోడేశ్వరా!మంగళకరమైన నీపాదసేవవలన లోకులకు

    సకలైశ్వర్యములు స్ధిరములైయుండును.దారపుత్రాదులకు

    మేలు ఎల్లప్పుడూ కల్గును.సమాజములో దివ్యత్వము సిద్ధించును.ఇది   

    సత్యము.

35.శా||కావే మాత్రము గష్ట సాధ్యములు,లోకమ్మందుగర్మావళుల్

         దేవా!తావకమైన పూజలకుభక్తిస్ఫూర్తిమై నిల్చు స

        త్సేవాధర్ములకంతరంగనిలయాధిష్ఠాన! గౌరీశ !శ్రీ

         దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ గౌరీపతీ! చోడేశ్వరా!సజ్జనులను సేవించుచు భక్తితో నీ పూ జలొనర్చు వారికి లోకసంబంధములైనయేపనులునుగాష్టసాధ్యములు

కావు.కాన నీవoదఱి యంతరంగములనుండి భక్తులకు సులభుడవై

యుందువు.    

36..శా||రావే హానులు రోగముల్ గుటిలగర్వస్ఫూర్తులున్ మూర్తిమ

        ద్భావా! తావకలింగరూపమునకున్ దంభేతరశ్రీకృతిన్  

       సేవలు సేసెడు భక్త కోటికి బరాశ్రీనిష్ఠ సర్వేశ్వరా

      దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా|| ఓ సర్వేశ్వరా! చోడేశ్వరా! నీలింగస్వరూపమునకు ఆడంబరము

      లేని సేవలుచేయుచు పరమునందు నిత్యమైన నిష్ఠతోనుండు భక్తులకు ఏ కీడులు ఏ రోగములు ఏ గర్వవికారములును రావు.

@@