శ్రీమదుమాచోడేశ్వరశతకం -12

                         శ్రీమదుమాచోడేశ్వరశతకం -12

                                           శ్రీ రావూరి వేంకటేశ్వర్లు

101 .శా||ఏవాడేనియు నాత్మదోషముల దానెంతేనియున్ నేరకే

            ఏ వానిన్ ఘనదోషయుక్తునిగా దానెంతేనియున్ జూపు

           సేవాసక్తుడొకండు నాపనికి దాజీకొట్టు నాత్మజ్ఞుడై

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!లోకమున సాధారణముగా బ్రతివాడును ప్రతివానిని

     దోషములు గలదానినిగా నిరూపించుటకు యత్నించును.కాని

     తనదోషములను గ్రహింపడు.నీ సేవయందాసక్తి గలవాడు మాత్ర

     మితరులనెన్నుపనిని అసహ్యించుకొనును.దానికి కారణము

    అతడు ఆత్మజ్ఞుడు.

102. శా||రావుర్యన్వయమందు బుట్టితిని నారామద్విజద్రావిడ

            శ్రీ వాస్తవ్యము శాఖ  ఋగ్నిగమమర్ధిన్ వేంకటేశాఖ్యుడన్

            ఏ విద్యావిభవంబు లేక నినునిట్లీరీతి బ్రార్ధించితిన్

           దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ఆరామద్రావిడులను బ్రాహ్మణుల సంపదలకు

     నిలయమైన ఋక్ఛాఖలో రావూరి వంశమున బుట్టినవాడను.

     ఎట్టి విద్యావిశేషము లేకున్నను భక్తితో నిన్నీరీతిగా బ్రార్ధించితిని.

103.శా||ఈ విశ్వoబదియెల్ల సౌఖ్యముల బ్రాహ్మీభావనాలోక వి

           ద్యావైదుష్యము పండి ధర్మకలనాద్రాఘిష్ఠమై పొల్చుతన్

         నీవాసంబగు దేవిపట్టణమునన్దీపించుతన్ సంపదల్

         దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ఈ ప్రపంచమంతయు ఇహసుఖములతో బ్రహ్మా

     జ్ఞానముతో వర్ధిల్లునుగాక.దేవీపట్టణమున సర్వసంపదలు

      వర్ధిల్లునుగాక.

104.శా||ఆవేశమ్మున మంచిచెడ్డలను సుంతైనన్ సమాలోచనం

           బేవేళన్ బచరింపకాత్మహితమున్ హింసించు కార్యమ్ములన్

          భావంబుల్ గికురింప సల్పుదునుదుర్వాదమ్ములన్ మాన్పవే

           దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా! ఆవేశములో మంచిచెడ్డలను గొంచెమైననాలోచింపక

    యెల్లప్పుడు నా మేలును నేను హింసించుకొనుపనులతో భావములను

    మోసగించుట చెడు వాదములను చేయుదును.నా యీ దుస్దితిని

    మాన్పుము.

105.శా||రావంబుల్ సకలంబు లోకృతిని నర్ధస్ఫూర్తి దీపింప వి

          ద్యావ్యారాం నిధులామహత్త్వమునుసత్యంబంచు బోధింప నీ

         సేవల్ దానియధార్ధ సారమిడ నీ జీవుండు ముక్తుoడగున్

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ధ్వనులన్నియు బ్రణవమున అర్ధస్ఫూర్తితొ బ్రకాశింపగా

    దాని మహత్త్వమునుజ్ఞానులు సత్యమని బోధింపగా నీ సేవ దాని యధార్ధతత్త్వముననుగ్రహించును. దానితో మాయాబద్ధుడగునీ

భక్తుడు ముక్తుడగును.  

106.శా||ఈ విశ్వంబదియెల్ల రాజ్యముగా నెంతేనిన్ వరింపన్ బ్రభు

           శ్రీ విస్తారము గల్గెనేని యెదలో జీవుoడు దుష్టించునా

           నీ వాల్లభ్యమునందుగా నిత్యంబు దుష్టించునో

          దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ఈ ప్రపంచమంతయు నప్రయత్నముగా తనకు దానై

     రాజ్యముగా లభించినను జీవుడు హృదయపూర్వకమైనతృప్తినొందడు.

     నీ ప్రభుత్వమున గింకరుడైన వాడు శాశ్వతమైన తృప్తిని గాంచును.

107 .శా||ఏ వేళన్ మదినీవునిండి కవితాహిందోళముల్ రేపి నీ

            సేవాకాలమునoదు గోష్ఠికిని నాచే బద్యముల్ వ్రాయగా

            జేవల్ దేరగజేయుమయ్య కవిరాజీధన్యతన్ గూర్చి యో

            దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!  ఎల్లపుడు నీవు నా మనసులో పరిపూర్ణముగా నుండి

     కవితాసంగీతమును బ్రేరేపించి నీ సేవాకాలమునబఠించుటకు బద్యములను వ్రాయుటలో పటువైన నైపుణ్యమును,కవులలో ధన్యత్వము గలుగునట్లు

సమకూర్పుము .

108.శా||ఈ విశ్వంబదియెల్ల సంపదలతో నీశప్రపత్తి న్గలా

           సేవన్ దౌష్ట్యవిహీన జీవులకు రాశీభూత సౌజన్యమై

        భావాతీత భావన్మహత్త్వ కలనా భాగ్యంబులన్బండుతన్

         దేవీ పట్టణ పర్వతేంద్ర శిఖరాధిష్ఠాన! చోడేశ్వరా!

తా||ఓ చోడేశ్వరా!ఈ ప్రపంచమంతయు సంపదలతో ఈశ్వరభక్తితో మంచితనపు ప్రోవుగా భావాతీతమైన నీ మహిమములను భాగ్యముతో పరిపక్వమైసఫలమగుగాక!